Global Chin News

Wednesday, Jul 30th

Last update07:41:31 AM GMT

Dawtnak Mit In Midang Sining Hmuhthiam

Minung kan sining ah tthen-awktthalo in kan i ngeihmi ziaza lakah pakhat cu 'thinhun' kan hman tawnmi hi asi ve. Thinhun ciocio hmanh ah a neem deuh le a faak deuh in a um. Culakah, zapi ko nih kan celh tawn lo mi cu midang he kan i siik tikah biafaak in an kan timi; kutke in fahnak an kan pekmi; asiloning in an kan ti i an kan thangchiat tikah kan thinhung tuk ttheu tawn.

Cutikah, taksa silole thinlung leiin kan cungah fah-innaak tuahtu/petu minung khi ngeihthiam kan i harh ngaingai. Kan thinhun lio ahcun kan mawh cio hna lo! Adik ko lai. A ngaingai tiah cun kan cungah thinhunnak, lungfahnak le ngeihchiatnak a tuahtu minung nihcun kan lung a fah; kan ngeih a chiat le kan thin a hun ding cu an rak i timhmi hrim asi kho ngai.

Asinain, thinhunnak cu kan thinlung chungah caansau kan chiah lo a hau. Aruang cu, midang cungah thinhun peng, lungfah peng, midang va huat, tbt..kan ngeih chung paoh cu kan mah lila kan thinlung kha thonginn (prison) kan rak tlaakter bantuk asi. Cun kan cungah fah-innaak a tuahtu pa/nu nih a thlitein kan thinlung-khuaruahning kha rak tleih (control) ter bantuk khi asi.

Zeithil poah hi a sawhsawh in a cang tawn lo; aruang (reason) a rak um tawn. Angaingai tiah cun fahnak a tuar-ingmi minung nihhin midang zong an fah-inter hna (hurting people hurt others) ti asi. Micheukhat cu an konglam thei lem loin an sining tah (judge) kan hmang ngai tawn. An keden kan i denh in kan kal ballo ahcun zeitlukindah an nunnak lamthluan ah harsatnak, lungretheihnak le temtuarnak an rak ton ti kha kan rak thei kho ti lo.

Mah pa/nu cu a bia a ro tuk; a biachim a chia tuk; a zia a chia tuk; a kawmh a nuam lo tuk; a holh lo tuk lawm maam; a nunning ziaza aa dawh lo tuk; biaruah zuam ding minung asi lo; a thilhruk fenh-aih huat a tlai tuk, tbt..tiang lawng kan rak theih khawh. Asinain, cu bantuk minung pawl sining kha caan tlawmpal la in an tuanbia/konglam (background) hngalh khawh pah ahcun an cungah tampi theihthiamnak le ngeihthiamnak ngeih khawh deuh asi.

Zeitlukindah lungfahnak, intuarnak an rak ton timi kan theih ahcun zawnruahnak le dawtnak mit in an sining dirhmun khi hmuhthiam khawh deuh asi. Hehchat tiah an sining va tah le va soisel lennak cun caan tlawmpal laakin an konglam theih khawh i zuam deuh ding asi.

Voitampi cu midang khi dawtnak mit (eyes of love) siloin biakhiahnak/tahnak mit (eyes of judgment) tu in kan rak zoh tawn hna. Zeitindah an rak tthanning, zeitindah an chungkhar a rak umning; zeitindah an sining dirhmun a rak si; zeibantuk velchum (enviroment) in dah an rak um bal, tibantuk pawl kha kan rak ruat tawn lo.

Micheukhat cu kan mah sining 'background based' lawngin midang tah kan hmang: cucu a palh tukmi ruahnak asi. Kanmah le kan sining cio ahhin kan tthawn deuhnak zawn a um bantukin kan der deuhnak zawn a um ko lai. Mah cu theihthiamnak ngeih lawnglawng ah dawtnak mit in midang sining dirhmun khi hmuhthiam asi.

Dawtnak timi a muru hi hrilhfiahnak pakhat tein langhter ahcun 'theihthiamnak' asi. Minung kan sining ah 'dawtnak (love)' timi le 'theihthiamnak (understanding)' timi a um lonak hmun ahcun 'thinlung, taksa le thlarau' hna hi sullam ngeilo mi nunnak an si.
...

Upatnak he,

Salai Van D.Ceu
Lewisville, Texas

 

 

//

Laica Kong

Interview Biahalnak

Minthang Thawng

Contact Us

Mailing Address
GLOBAL CHIN
MEDIA GROUP

215 Sand Beach Bvld,
Apt 107

Shreveport, LA 71105
USA

globalchinnews@gmail.com
_________________

Global Chin News is a non-profit news agency